Niderlandiyaning Veyk-an-Zeye shahrida shaxmat bo‘yicha an’anaviy "Tata Steel Chess-2025" musobaqasi bo‘lib o‘tmoqda.
Nufuzli turnirning "Masters" guruhida Nodirbek Abdusattorov, "Chellenjer" guruhida esa Nodirbek Yakubboyev sovrinli o‘rinlar uchun bahs olib boryapti. Har ikki hamyurtimiz birinchi turni hindistonlik raqiblariga qarshi o‘tkazishgandi. Abdusattorov azaliy raqiblaridan biri — Rameshbabu Pragnanandxa bilan durangga rozi bo‘lgan, Yakubboyev esa Divya Deshmux ustidan g‘alabaga erishgandi.
Ikkinchi turda birinchi turning aksi bo‘ldi. Nodirbek Abdusattorov bu safar yana bir hind grossmeysteri Leon Luke Mendonsani taslim eta oldi. "Chellenjer" guruhida qatnashayotgan Nodirbek Yakubboyev esa qozog‘istonlik Kazibek Nogerbek bilan durangga rozi bo‘ldi.
"Masters" guruhida 2-turdan keyin ochko yo‘qotmagan ishtirokchi qolmadi. Turnirning birinchi tartib raqamli shaxmatchisi Gukesh Dommaradju qora donalarda Vladimir Fedoseyev bilan murosaga keldi. Uchinchi tur oldidan amerikalik Fabiano Karuana 1,5 ochko bilan qo‘shimcha ko‘rsatkichlarga ko‘ra peshqadamlik qilyapti. Kuchli uchlikka Gukesh va Nodirbek yakun yasashgan. Rameshbaba Pragnanadha va Vinsent Keymer hisobida ham 1,5 ochkodan bor.
