1-2-3-iyun kunlari Xiva shahrida “Pahlavon Mahmud - Strongmen games Islom Xalqaro Tashkiloti ochiq chempionati" bo‘lib o‘tadi. Mazkur xalqaro musobaqa 2024-yil 31-may 2- iyun kunlari "Xiva — 2024-yilda islom dunyosining turizm shahri" shiori ostida bo‘lib o‘tadi. Pahlavon Mahmud xotirasiga bag‘ishlangan xalqaro turnir Xiva shahrida 4-marotaba o‘tkazilmoqda.
Turnir Ekologiya, atrof-muhitni muhofaza qilish vazirligi, Turizm qo‘mitasi, Xalqaro Strongmen Federatsiyasi, Xorazm viloyati hokimligi va boshqa tashkilotlar hamkorligida tashkil etilgan.
Bu yilgi turnirda dunyoning 15 dan ortiq mamlakatlaridan (Buyuk Britaniya, Bahrayn, Chexiya, Avstraliya, Latviya, Litva, Pokiston, Yangi Zelandiya, Turkiya, Hindiston, Qozog‘iston, Qirg‘iziston, Tojikiston va O‘zbekiston) kelgan pahlavonlar o‘zaro bahslashadilar.
Ushbu xalqaro musobaqa sport turizmi sohasida xalqaro hamkorlikni kengaytirish, tashqi va ichki bozorlarda O‘zbekistonning turistik salohiyati va imkoniyatlarini targ‘ib qilish, mamlakatimiz yoshlarini sportga bo‘lgan qiziqishlarini rag‘batlantirish maqsadida tashkil etilmoqda. Shu bilan birga, Qoraqalpog‘istonning turizm potensialini yana-da oshirish maqsadida musobaqaning ikkita sharti Axchako‘l bo‘yida o‘tkaziladi.
Xalqaro turnirda pahlavonlar jami 7 ta shart bo‘yicha bahs olib borishadi.
Jumladan:
- Oqtosh xarsangi;
- Obkach;
- Amudaryo qayig‘ini tortish;
- Cho‘girma otish;
- Mo‘ynoq langarini tortish;
- Xiva ustunlarini ushlab turish;
- Qilichni vertikal ushlab turish.
Bugun, 31-may kuni ushbu musobaqada qatnashish uchun Xiva shahriga tashrif buyurgan polvonlar aeroportda kutib olindi. Bu haqda UzReport TV muxbiri xabar bermoqda. Ushbu chempionatni "UzReport TV" telekanalida 3 kun davomida jonli efirlarimizda tomosha qilishingiz mumkin.
