Germaniyada o‘tkazilgan shaxmat bo‘yicha Freestyle jahon chempionati yakuniga yetdi. Musobaqa dramatik bahslar va kutilmagan burilishlarga boy tarzda o‘tdi.
Musobaqada O‘zbekiston sharafini ikki nafar grossmeyster himoya qildi. Ayniqsa, Nodirbek Abdusattorov jahon chempionatini ishonchli tarzda o‘tkazdi. U umumiy bosqichda muhim ochkolarni to‘plab, musobaqaning yarimfinaliga chiqdi. O‘zbekistonlik yosh shaxmatchining yarimfinaldagi raqibi Karlsen bo‘ldi va hamyurtimiz 1:3 hisobida imkoniyatni boy berdi.
Uchinchi o‘rin uchun kechgan bellashuvda esa Nodirbek mezbonlar vakili Vinsent Keymer ustidan 2,5:1,5 hisobida g‘alaba qozonib, bronza medalini qo‘lga kiritdi. Abdusattorov 40 ming AQSH dollari miqdoridagi mukofotga sazovor bo‘lish barobarida, 2027 yilgi Freestyle jahon chempionatiga yo‘llanmani ham hal qilib qo‘ydi.
Final uchrashuvida esa norvegiyalik grossmeyster Magnus Karlsen AQSH vakili Fabiano Kruanani 2,5:1,5 hisobida mag‘lub etib, faoliyatida 21-bor jahon chempionligiga erishdi.
Yana bir vakilimiz Javohir Sindarov esa musobaqani 8-o‘rinda yakunladi. U 10 ming dollar miqdoridagi pul mukofoti bilan taqdirlandi.
