O‘zbekistonlik professional bokschi Murodjon Ahmadaliyev navbatdagi jangini joriy yilning 14 sentyabr kuni o‘tkazadi. Bu haqda bokschi o‘zining Instagram sahifasida ma’lum qildi.
O‘sha kuni Murodjon Ahmadaliyev Yaponiya poytaxti Tokio shahrida mutlaq chempion Naoya Inoue bilan jang qiladi.
Ma’lumot uchun, joriy yil bahorning boshida Ahmadaliyev va Inoue jamoalari, shuningdek, WBA rahbariyati kelishuvga erishgan edi. Unga ko‘ra, Naoya Inoue 4 may kuni o‘z kamarini ixtiyoriy ravishda himoya qiladi, undan so‘ng esa sentyabr oyida Ahmadaliyev bilan jang qiladi. Bu kelishuv kuchga kirishi uchun har ikki bokschining ham navbatdagi janglarida g‘alaba qozonishi shart edi.
Inoue 4 may kuni Ramon Kardenasni nokaut qilgan bo‘lsa, Ahmadaliyev 30 may kungi jangda o‘z vazifasini bajarishga muvaffaq bo‘ldi. U 5- va 6-raundlarda Kastiloni nokdaunga tushirdi, 8-raunddagi ketma-ket zarbalaridan so‘ng esa meksikalik bokschining murabbiyi oq sochiq uloqtirib, jangni to‘xtatishga majbur bo‘ldi. Shu orqali Ahmadaliyev profboksdagi g‘alabalari sonini 14 taga yetkazib oldi. 30 yoshli Ahmadaliyev profringda 14-1 rekordga ega, uning bo‘lajak raqibi 32 yoshli Naoya Inoue esa profboksda 30 ta g‘alaba qayd etgan va biror marta mag‘lubiyatga uchramagan.
