O‘zbekiston boks federatsiyasi mutasaddilari, terma jamoamiz murabbiylari va bokschilar ishtirokida kattalar o‘rtasidagi Osiyo chempionatida terma jamoamizning ishtiroki va Parij Olimpiadasi sarhisobiga bag‘ishlangan yig‘ilish o‘tkazildi.
Havaskor boksdagi faoliyatini yakunlagan terma jamoa sardori, ikki karra Olimpiada va jahon chempioni Bahodir Jalolovning o‘rniga, jamoa sardorligi ikki karra Olimpiya o‘yinlari va jahon chempioni Hasanboy Do‘smatovga topshirildi.
Yig‘ilish davomida har bir murabbiyning hisoboti tinglandi. Ayollar terma jamoamizni kuchaytirish va keyingi musobaqalarga puxta tayyorlash to‘g‘risida tegishli vazifalar belgilandi.
Shuningdek, kattalar o‘rtasida o‘tkazilishi kutilayotgan O‘zbekiston chempionatining tashkiliy masalalari va qitʼa birinchiligida munosib natijalarga erishish xususida fikr-mulohazalar bildirildi.
