Ijtimoiy tarmoq sahifalarida “Chilonzordagi bog'chada 5 yoshli bola 2 etajdan tushib ketibdi” sarlavhasi ostida xabarlar tarqaldi.
Mazkur holat yuzasidan Toshkent shahar maktabgacha va maktab ta'limi boshqarmasi rasmiy munosabat bildirdi.
Qayd etilishicha, bu voqea 2025-yil 30-iyun kuni taxminan soat 9.45 lar atrofida Chilonzor tumanidagi 7-sonli davlat maktabgacha ta'lim tashkilotida ro'y bergan. Ta'lim tashkilotida tarbiyalanuvchi R. I. nazoratsizlik oqibatida ikkinchi qavat zinasidan yiqilib tushgan. Bundan xabar topgan tashkilot hamshirasi tarbiyalanuvchiga birinchi tez tibbiy yordam ko'rsatgan va 16-sonli shahar shifoxonasi bolalar bo'limiga olib borishgan.
Shifokorlarning birlamchi tashxisiga ko'ra, tarbiyalanuvchi R. I. ga “ikki qo'l bilak sohasi sinishi, burun suyak sohasi sinishi, yuqori jag' kurak tishlarining aliyonlari osig'ining sinishi” tashxisi qo'yilgan. Bolaning ahvoli og'ir bo'lganligi sababli jonlashtirish bo'limiga joylashtirishganligi, ahvoli yaxshilanganidan so'ng jonlantirish bo'limidan chiqarishganligi aniqlangan.
Ayni paytda holat bo'yicha Chilonzor tuman IIO FMB xodimlari tomonidan tergovga qadar surishtiruv ishlari olib borilmoqda.
ESlatib o'tamiz, bundan oldin Samarqanddagi bog'chada tarbiyachi o‘nga yaqin bolani kaltaklagani haqida xabar bergan edik.
