Toshkent shahrida 55 mln so‘mlik oyoq kiyimlarni o‘g‘irlagan 35 yoshli o‘g‘ri ushlandi. Bu haqda shahar Ichki ishlar bosh boshqarmasi matbuot xizmati xabar berdi.
Ma’lum qilinishicha, joriy yilning yanvar-fevral oylarida noma’lum shaxs Chilonzor tumanida joylashgan yirik savdo majmuasi omboridan 2001 yilda tug‘ilgan S.U.ga tegishli 55 mln so‘mlik 275 juft ayollar poyabzalini o‘g‘irlab ketgan.
Ko‘rilgan chora-tadbirlar natijasida ushbu jinoyatni sodir etishda gumon qilingan 1990 yilda tug‘ilgan N.O. aniqlanib, qo‘lga olingan. Mazkur holat yuzasidan O‘zbekiston Respublikasi Jinoyat kodeksining 169-moddasi (O‘g‘rilik) bilan jinoyat ishi qo‘zg‘atilgan.
“Tergov davom etmoqda. Gumonlanuvchiga nisbatan qamoqqa olish tarzidagi ehtiyot chorasi qo‘llangan”, deyiladi xabarda.
