Korrupsiyaga qarshi kurashish yo‘nalishida Davlat xavfsizlik xizmatining Sirdaryo viloyati bo‘yicha boshqarmasi xodimlari tomonidan o‘tkazilgan tezkor tadbirda Majburiy ijro byurosi Mirzaobod tuman bo‘limi 2 nafar davlat ijrochisining noqonuniy harakatiga chek qo‘yildi.
Aniqlanishicha, fuqarolik ishlari bo‘yicha Guliston tumanlararo sudining 2021 yil dekabr oyidagi ijro varaqasiga asosan, qarzdor shaxsdan undiruvchi fuqaro foydasiga 30 mln so‘m miqdorida moddiy va maʼnaviy zarar undirish belgilangan bo‘lib, u mazkur davlat ijrochilaridan birining ish yurituvida bo‘lgan.
Shaxsiy boylik orttirishni maqsad qilgan davlat ijrochilari qarzdor fuqarodan ijro ishini tugatish evaziga 20 mln so‘m olib, undiruvchi fuqaroga go‘yoki qarzdor og‘ir sharoitda ekanligini ro‘kach qilib, pulning 14 mln so‘m qismini berishgan hamda undan 30 mln so‘m olganligi va daʼvosi yo‘qligi to‘g‘risida tilxat yozdirib olishgan.
So‘ngra ular qolgan 6 mln so‘mni tuman prokuraturasi binosi oldida o‘zaro 3 mln so‘mdan taqsimlab olgan vaqtlarida ashyoviy dalillar bilan ushlandi.
Holat yuzasidan Sirdaryo viloyat prokuraturasi tomonidan mazkur MIB davlat ijorchilariga nisbatan jinoyat ishi qo‘zg‘atilib, “qamoq” ehtiyot chorasi qo‘llanildi.
Hozirda tergov harakatlari olib borilmoqda.
