Samarqandda o‘tkaziladigan «Markaziy Osiyo — Yevropa Ittifoqi» birinchi sammiti munosabati bilan shaharga kirish yo‘llari vaqtinchalik yopiladi. Bu haqda Samarqand viloyati IIB Yo‘l harakati xavfsizligi boshqarmasi xabar berdi.
Qayd etilishicha, 3, 4 va 5 aprel kunlari viloyat hududidan tranzit o‘tuvchi transport vositalari uchun aylanma harakat tashkil etiladi. Haydovchilar uchun maxsus flayerlar ishlab chiqilgan bo‘lib, uni QR-kod yordamida mobil ilova orqali ham ko‘rish mumkin.
«Hurmatli haydovchilar, belgilangan tartib-qoidalarga qat’iy amal qilishingizni so‘rab qolamiz», — deyiladi xabarda.
Shuningdek, boshqarma mazkur kunlarda Samarqand shahriga tashrif rejalashtiriganlardan imkon qadar boshqa kunlarga qoldirishlarini so‘radi.
