2024-yil 11-yanvar kuni Rossiya Federatsiyasi Favqulodda vaziyatlar vazirligi navbatchilik qismidan olingan maʼlumotga koʻra, joriy yilning 11-yanvar kuni (Moskva vaqti bilan) soat 02:20 larda Rossiya Federatsiyasi, Penza viloyati, Nijnelomov rayoni M-5 avtomobil yoʻlining 503 km.da harakatlangan “JACH” rusumli “Miniven” avtomobili va “Volvo” rusumli yuk avtomobili toʻqnashishi oqibatida “JACH” rusumli “Miniven” avtomobili ichida boʻlgan jami 9 nafar Oʻzbekiston Respublikasi fuqarolaridan 7 nafari voqea joyida halok boʻlgan, 2 nafar yoʻlovchi turli darajada tan jarohati olib, shifoxonaga yotqizilgan va tibbiy muolajalar koʻrsatilmoqda.
Prezident Shavkat Mirziyoevning topshirig'iga asosan Favqulodda vaziyatlar, Tashqi ishlar, Ichki ishlar, Sogʻliqni saqlash va Transport vazirliklari, Tashqi mehnat migratsiyasi agentligi va boshqa tegishli tashkilotlar bilan hamkorlikda Mudofaa vazirligining maxsus samolyotida, vafot etgan va jabrlangan fuqarolarimizni vatanga olib kelish yuzasidan kerakli barcha zarur chora-tadbirlar koʻrilmoqda.
Shuni alohida taʼkidlash joizki, Rossiya Federatsiyasi masʼullari yuzaga kelgan mazkur baxtsiz hodisa oqibatlarini zudlik bilan bartaraf etish, jarohatlanganlarga tez tibbiy yordam koʻrsatishda yaqindan koʻmak berishmoqda.
