Rossiyada ishlayotgan o‘zbekistonliklarga moddiy yordam berildi, deb xabar qilmoqda Tashqi mehnat migratsiyasi agentligi.
Unga ko‘ra, Tashqi mehnat migratsiyasi agentligining Rossiya Federatsiyasidagi vakillari Tuladagi “Tyajpromarmatura”, Samaradagi “Teplichniy”, Ufadagi “Mobil Beton”, Boshqirdiston Respublikasidagi “Severnoye” korxonalarida bo‘lib, yurtdoshlar va ularning ish beruvchilari bilan uchrashuvlar o‘tkazdi.
Uchrashuvda ish beruvchilar bilan mehnat migrantlariga munosib yashash va ish sharoitlarini yaratish, ish haqini vaqtida to‘lash, hujjatlarni rasmiylashtirishda ko‘maklashish masalalari muhokama qilindi.
Yurtdoshlarga prezidentning 2024-yil 4-apreldagi “Mehnat migratsiyasi jarayonlarini takomillashtirish hamda xorijda vaqtincha mehnat faoliyatini amalga oshirayotgan shaxslarni qo‘llab-quvvatlashga doir qo‘shimcha chora-tadbirlar to‘g‘risida”gi farmoni mazmun-mohiyati tushuntirildi.
Permda ishlayotgan yurtdoshlarga huquqiy va moddiy yordam ko‘rsatildi.
