Xalqaro Nordik universitetida Erkin Vohidov nomidagi “E voh" o‘zbek tili va adabiyoti olimpiadasining yakuniy bosqichi o‘tkazilmoqda.
Ilk bor 21-oktyabr - "O‘zbek tili bayrami"ga bag‘ishlab tashkil etilgan "E voh" olimpiadasi respublikamiz bo‘ylab 10 507 nafar o‘qituvchilarni o‘zida jamladi. Birinchi bosqichda g‘olib bo‘lgan eng sara 79 нафар ishtirokchi-ustoz final bosqichda qatnashish uchun yetib keldilar.
Fan olimpiadasi o‘zbek tiliga mehr, fidoyilik namunasi bo‘lmoqda. Yurtimizning ilmga tashna, yosh avlod qalbiga ona tili jozibasini singdirishga g‘ayrati cheksiz, yangiliklarga intiluvchan o‘qituvchilari ushbu olimpiadada faxr bilan ishtirok etishmoqda.
Olimpiadada Nordik universiteti rektori, professor Sherzod Mustafakulov bu ilmiy-maʼrifiy tashabbus nafaqat kasbiy bilim va salohiyat sinovi, balki barchaning qalbida milliy g‘urur va ona tiliga muhabbatni yanada mustahkamlashga xizmat qiladigan muhim maydon ekanini taʼkidlab o‘tdi. Ustozlarning bugungi ishtiroki faqatgina tanlov emas, balki yurtimizda ilm-fan rivojiga qo‘shiladigan hissa ham ekanligi eʼtirof etildi. Barcha ishtirokchilarga omad, yuqori natijalar va yorqin g‘alabalar tilandi.
Ishtirokchilar olimpiada tartib-qoidalari, baholash mezonlari bilan tanishtirildilar. Ustozlarning insho yozish mahoratlari sinovdan o‘tkazilmoqda.
Sinovlardan so‘ng oldinda ishtirokchilarni ilmiy muloqotlar, Abidlar xiyoboniga tashrif va maʼrifiy, adabiy suhbatlar, Green Hills Resort tog‘li manzilida "Ona tili bayrami"ga bag‘ishlangan festival kutmoqda.
Fan olimpiadasida 1 ta oltin, 3 ta kumush va 5 ta bronza medali sohiblari aniqlab olinadi. Pul mukofotlari, esdalik sovg‘alari, Finlandiya, Shvetsiya davlatlariga xorijiy dasturlarda malaka oshirish yo‘llanmalari ham o‘z egalariga tantanali topshiriladi.
