O'zbekiston Farmatsevtika tarmog'ini rivojlantirish agentligi direktori Abdulla Azizov Hindistonning "TIL Healthcare" kompaniyasi delegatsiyasi bilan uchrashuv o'tkazdi, deb xabar qilmoqda "Dunyo" AA.
O'zbekistonning Dehli shahridagi elchixonasi ma'lumotiga ko'ra, tadbirda mamlakatimizda so'nggi yillarda amalga oshirilayotgan keng ko'lamli islohotlar natijalari, xorijlik sarmoyadorlar bilan hamkorlik qilish uchun yaratilgan qulay muhit haqida so'zlab berildi. Farmatsevtika sohasini yana-da rivojlantirish, aholini zamonaviy, sifatli va arzon dori-darmon vositalari bilan ta'minlash maqsadida ko'rilayotgan tizimli chora-tadbirlar, "Tashkent Pharma Park" innovatsion ilmiy-ishlab chiqarish farmatsevtika klasteri faoliyati, chet el kompaniyalariga taqdim etilayotgan imtiyozlarga alohida e'tibor qaratildi.
Tomonlar birgalikda farmatsevtika mahsulotlari ishlab chiqarish va ularni uchinchi mamlakatlarga eksport qilish bo'yicha sheriklik imkoniyatlarini muhokama qildi.
"TIL Healthcare" mahsulotlari Osiyo, Afrika, MDH, Markaziy va Lotin Amerikasining 50 dan ortiq mamlakatiga eksport qilinadi. Kompaniya malakali kadrlar va mustahkam infratuzilmaga ega bo'lib, farmatsevtika sohasida joriy qilayotgan ilg'or innovatsiyalari va tayyorlayotgan sifatli dori-darmon tovarlari bilan nom qozongan.
Hindistonlik farmatsevtlar O'zbekistonda qo'shma loyihalar amalga oshirishga qiziqish bildirdi va mahalliy hamkorlar bilan ushbu maqsadga qaratilgan muzokaralar olib borayotganini ma'lum qildi.
