26-oktyabr kuni qabul qilingan hukumat qarori bilan Oʻzbekiston hududida foydalanilayotgan, sotish yoki shaxsiy foydalanish uchun olib kirilgan mobil qurilmalarni roʻyxatga olish tartibiga oʻzgartirish va qoʻshimchalar kiritildi.
Endilikda jismoniy shaxslar xorijdan oʻzi bilan olib kirgan ikkita mobil qurilma (telefon)ni bojxona toʻlovlarisiz roʻyxatdan oʻtkazishi mumkin. Bungacha bitta telefonni roʻyxatdan oʻtkazishga ruxsat berilgan edi.
Shuningdek, telefonlarni UzIMEI tizimida roʻyxatga olishda masofadan turib (onlayn) shaxsni biometrik identifikatsiya (Face-ID) qilish joriy etildi.
Oʻzbekistonga xizmat safari yoki turizm uchun kelayotgan xorijiy fuqarolar mobil qurilmalaridan roʻyxatdan oʻtkazmasdan foydalanish davri amaldagi 30 kalendar kunidan 60 kalendar kunigacha uzaytirildi.
