Ehtiyojmand oilalardagi xotin-qizlarga OTMlarga kirishga tavsiyanoma olish uchun arizalar qabuli boshlangan edi. Oila va xotin-qizlar qo‘mitasining ma’lum qilishicha, 36 ming 853 nafar talabgor xotin-qizdan tavsiyanoma olish uchun arizalar onlayn qabul qilingan.
8-10-iyun kunlari tuman (shahar) ishchi guruhlari tomonidan arizalar Nizom talablari asosida ko‘rib chiqilib, xulosalar berilgan. Shuningdek, tuman (shahar) oila va xotin-qizlar bo‘limlari tomonidan talabgor xotin-qizlarga tavsiyanoma berish yoki tavsiyanoma berishni rad etish to‘g‘risida buyruqlar rasmiylashtirilgan.
Oila va xotin-qizlar qo‘mitasi tomonidan taqdim etiladigan hujjatlar ko‘rib chiqilib, talabgorlarga tavsiyanoma berish yoki tavsiyanoma berishni rad etish to‘g‘risida qo‘mita raisining 14-iyundagi 81-sonli buyrug‘i qabul qilingan. Unga ko‘ra respublika bo‘yicha jami 18 ming 481 nafar (50,1 foiz) xotin-qizlarga tavsiyanoma berildi, 18 ming 372 nafar (49,9 foiz) talabgorga tavsiyanoma berish rad etilgan.
Shundan eng ko‘p tavsiyanoma Farg‘ona (2 120ta), Samarqand (2 014 ta), Qashqadaryo (1 848 ta), Qoraqalpog‘iston Respublikasi (1 623 ta), Andijon (1 592 ta) viloyatlarida berilgan. Tuman (shahar)lar kesimida eng ko‘p — Qo‘shrabot (270 ta), Quva (262 ta), Rishton(259 ta), Urgut (255 ta) Pop (239 ta), Amudaryo(236 ta), Qamashi (213 ta), G‘uzor (213 ta), Jalaquduq (212 ta), Sherobod (212 ta) tumanlarida.
Berilgan tavsiyanomalar “Xotin-qizlar.uz” elektron platformasida mavjud. Platforma maʼlumotlari Maʼlumotlarni saqlash va qayta ishlash markaziga ko‘chirilgani bois, integratsiya jarayonlarida tegishli IP manzillarda o‘zgarish yuzaga kelgan. Hozirda mazkur texnik masalalar bartaraf etilganidan so‘ng, berilgan tavsiyanomalar Bilim va malakalarni baholash agentligining tegishli platformasiga integratsiya qilinadi.
