Tojikiston chegara qo‘shinlarining ikki nafar harbiy xizmatchisi 24 dekabrga o‘tar kechasi Afg‘oniston tomonidan chegarani noqonuniy kesib o‘tgan terrorchilar bilan qurolli to‘qnashuvda halok bo‘ldi. Bu haqda Tojikiston Milliy xavfsizlik davlat qo‘mitasi Chegara qo‘shinlari matbuot xizmati xabar berdi.
Hodisa Shamsiddin Shohin tumanidagi “Sarchashma” chegara otryadining 5-sonli “Sod” chegara posti hududida sodir bo‘lgan. 23 dekabr kuni soat 23:30 da uch nafar jangari davlat chegarasini yashirincha kesib o‘tgan, ularning joyi ertasi kuni, 24 dekabr soat 11:15 da aniqlangan.
Chegarachilarning taslim bo‘lish haqidagi talabiga jangarilar o‘q uzish bilan javob qaytargan. Milliy xavfsizlik davlat qo‘mitasi maʼlumotlariga ko‘ra, terrorchilar Tojikiston Chegara qo‘shinlari postlaridan biriga hujum qilishni rejalashtirgan. Otishmada uchala jangari ham o‘ldirilgan.
To‘qnashuv joyida huquq-tartibot idoralari xodimlari uchta M-16 miltig‘i, bitta Kalashnikov avtomati, xorijda ishlab chiqarilgan ovoz so‘ndirgichlar bilan jihozlangan uchta to‘pponcha, shuningdek, o‘nta qo‘l granatasini topib, musodara qilgan. Bundan tashqari, qoidabuzarlar yonida tungi ko‘rish moslamasi, portlovchi moddalar va turli o‘q-dorilar bo‘lgan.
Teraktning oldini olish operatsiyasi davomida tojikistonlik ikki harbiy xizmatchi - Zirexbon Navro‘zbekov va Ismatullo Qurbonov halok bo‘lgan. Chegara qo‘shinlari xizmat burchini bajarish chog‘ida shaxsiy tarkibning yo‘qolishi munosabati bilan hamdardlik bildirdi.
Xabarga ko‘ra, so‘nggi bir oy ichida bu Afg‘oniston hududiga kelgan yoki u yerda bo‘lgan jangarilar tomonidan tinch aholi yoki harbiy xizmatchilar halok bo‘lgan uchinchi qurolli hujumdir.
«Ushbu faktlar toliblar hukumati Tojikiston Respublikasi bilan davlat chegarasida xavfsizlik va barqarorlikni taʼminlash hamda terrorchilik tashkilotlari aʼzolariga qarshi kurashish bo‘yicha o‘zining xalqaro majburiyatlari va vaʼdalarini bajarishda jiddiy va bir necha bor masʼuliyatsizlik ko‘rsatayotganini isbotlaydi», deyiladi Milliy xavfsizlik davlat qo‘mitasi Chegara qo‘shinlari xabarida.
Qo‘mita Afg‘onistonda hukmronlik qilayotgan “Tolibon” harakati rahbariyati Tojikiston xalqidan rasman uzr so‘rashi va chegarada xavfsizlikni mustahkamlash uchun taʼsirchan choralar ko‘rishiga umid bildirdi. Shuningdek, davlat chegaralarini himoya qilish uchun barcha zarur kuch va vositalar mavjudligini qatʼiy taʼkidladi.
Hozir chegaradagi vaziyat tinch deb baholanmoqda, hodisa yuzasidan tergov harakatlari davom etmoqda.
