2023-yilda Davlat tibbiy sug‘urtasi jamg‘armasi tomonidan imtiyozli toifaga kiruvchi 97 ming nafardan ziyod bemorga tibbiy yordam xarajatlarini qoplash uchun 772 mlrd so‘m to‘lab berildi. Bu haqda Jamg‘arma axborot xizmati rahbari Sayyora Shoyeva ma’lum qildi.
Qayd etilishicha, imtiyozli toifaga kiruvchi shaxslarga elektron yo‘llanma asosida ko‘rsatilgan tibbiy yordam xarajatlarini qoplash maqsadida 2023-yilda 14 ta respublika ixtisoslashtirilgan ilmiy-amaliy tibbiyot markazi, 11 ta respublika darajasidagi, 41 ta hududiy tibbiyot muassasasi hamda 34 ta nodavlat tibbiyot tashkiloti bilan shartnomalar tuzildi.
Imtiyozli toifaga kiruvchi bemorlarga ko‘rsatilgan tibbiy xizmatlarni asoslovchi hujjatlarni Jamg‘armaga to‘lov uchun yuborish va ko‘rib chiqish jarayonlarini raqamlashtirish maqsadida Jamg‘arma “Medrefer” axborot tizimini ishga tushirdi va shartnoma tuzgan barcha davlat va nodavlat tibbiyot tashkilotlariga to‘liq joriy etdi.
Bemorlarning ko‘rsatilgan tibbiy xizmatlar sifatidan roziligini baholash uchun “qaytar aloqa” tizimi yo‘lga qo‘yilib, korrupsiya xavf-xatarlarini kamaytirishga erishilmoqda.
Qonunchilikka ko‘ra, joriy yilning 1 yanvaridan imtiyozli toifaga kiruvchi shaxslarga Davlat byudjeti mablag‘lari hisobidan otorinolaringologiya (LOR) va yuz-jag‘ jarrohligi yo‘nalishlaridagi tibbiy xizmatlar nodavlat tibbiyot tashkilotlari tomonidan ko‘rsatilishiga ruxsat berildi.
