Ukrainaning favqulodda va muxtor elchisi Nikolay Doroshenko O‘zbekistondagi diplomatik missiyasini yakunlamoqda. Bu haqda u Facebook ijtimoiy tarmog‘idagi sahifasida maʼlum qildi.
«Ukraina prezidenti Vladimir Zelenskiy diplomatik korpus rotatsiyasi doirasida mening O‘zbekistondagi missiyamni yakunlash to‘g‘risida farmon qabul qildi. Bu mamlakatim rahbariyatiga, xalqimga bo‘lgan ishonchning eng yuqori darajasi va men buni oqlash uchun qo‘limdan kelganini qildim», — deb yozdi u.
Uning qo‘shimcha qilishicha, u O‘zbekistondagi faoliyati davomida mamlakat uchun og‘ir damlarda uning manfaatlarini ifodalash va himoya qilish sharafiga muyassar bo‘ldi.
«Ishimga baho berish huquqini boshqalarga qoldiraman, o‘z nomimdan faqat shuni aytamanki, qilgan ishim uchun uyalmayman… Mening vazifam haqiqatni aytish, haqiqatni o‘zbek jamiyatiga yetkazish, ularga bugungi kunda Ukraina qanday yashayotganini tushuntirish edi. Umid qilamanki, mehnatim tufayli o‘zbek muhitida haqiqat urug‘lari ko‘proq unib chiqadi», — dedi u.
