2024-yil 12-dekabr kuni Bryussel shahrida “O‘zbekiston-Yevropa Ittifoqi” parlament hamkorligi qo‘mitasining 17-majlisi bo‘lib o‘tdi. Uning ishida Senat Raisining birinchi o‘rinbosari Sodiq Safoyev boshchiligidagi O‘zbekiston Respublikasi Oliy Majlisi delegatsiyasi ishtirok etdi.
Majlis davomida O‘zbekiston va Yevropa Ittifoqi o‘rtasidagi ikki tomonlama hamkorlikni rivojlantirish istiqbollari va joriy kun tartibining asosiy masalalari muhokama qilindi. Hamkorlikni mustahkamlashda sezilarli yutuqlar qayd etilib, o‘zaro aloqalarni rivojlantirishning ustuvor yo‘nalishlariga eʼtibor qaratildi.
Parlamentlararo hamkorlikni mustahkamlash, shuningdek, barqaror rivojlanish, savdo, energetika va ekologiya sohalarida qo‘shma tashabbuslarni amalga oshirish masalalariga alohida urg‘u berildi.
“O‘zbekiston – Yevropa Ittifoqi” parlament hamkorligi qo‘mitasining navbatdagi majlisini 2025 yilda O‘zbekistonda o‘tkazishga kelishib olindi.
