Saneg kompaniyasi strategik hamkori – VEMA Carbon (Shveysariya) ishtirokida Navoiy viloyatida joylashgan "Sho‘rchi" neftni tayyorlash qurilmasida yo‘ldosh neft gazini (YNG) utilizatsiya qilish loyihasini amalga oshirdi.
Yangi infratuzilmaning ishga tushirilishi tufayli kuniga 20 mingdan 25 ming m3 gacha gaz qayta ishlanmoqda, bu esa korxonaning energiya samaradorligini oshirish va CO₂ chiqindilarini kamaytirish imkonini beradi.
Loyiha doirasida yettita ZWF 0.36/6-0.42 kompressor agregati va bitta Ariel JCG/2 agregatini o‘z ichiga olgan modulli kompressor qurilmasi (MKQ) qurildi. Qayta ishlangan gazni tashish uchun "Oqjar yig‘ish punkti" stansiyasigacha 3 km uzunlikdagi gaz quvuri yotqizildi, bu esa gazni keyingi qayta ishlash va foydalanish uchun barqaror yetkazib berishni ta’minlaydi.
Loyihalashdan tortib ishga tushirishgacha bo‘lgan barcha bosqichlar zamonaviy muhandislik yechimlarini qo‘llagan holda, sanoat va ekologik xavfsizlik standartlariga qat’iy rioya qilib amalga oshirildi. Loyihaga qariyb 1,5 million AQSH dollari miqdorida sarmoya kiritilgan.
Loyiha tashabbuskori Saneg Strategik loyihalar va ilmiy-texnik rivojlanish departamenti bo‘ldi. Bu kompaniyaning muhandislik va ishlab chiqarish bo‘linmalari hamda VEMA Carbon hamkorlarining birgalikdagi ishi natijasidir, ular uglerod menejmenti va atrof-muhit monitoringi sohasida zamonaviy yechimlarni joriy etdilar.
"Loyiha uglerod izini kamaytirish va mamlakat neft-gaz sektorini barqaror rivojlantirishga qaratilgan Sanegning izchil ESG strategiyasining bir qismi bo‘ldi. Yaqin kelajakda biz konning qo‘shimcha quduqlarini jalb etish orqali kunlik gaz haydash hajmini 50 ming m³ gacha oshirishni rejalashtirmoqdamiz". – dedi bosh direktor To‘lqin Yusupov.
