Shu kunlarda Xitoy Xalq Respublikasida bo‘lib turgan Samarqand viloyati hokimi vazifasini bajaruvchi A.Boboyev Tyanszin shahrida "Tianjin Pump Machinery Group" hamda "Tianjin Baili Equipment Group" korxonalari rahbarlari bilan uchrashuvda shunday kelishuvga erishdi.
Jumladan, Xitoydagi gidronasos va generatorlar ishlab chiqaruvchi eng yirik korxonalardan biri bo‘lgan "Tianjin Baili Equipment Group" kompaniyasi raisi Vu Jeyjun boshchiligidagi boshqaruv kengashi aʼzolari bilan muzokaralar chog‘ida hamkorlikda ishchi guruh tashkil etib, mini GESlar qurish uchun mavjud imkoniyatlarni o‘rganish va loyihalar ishlab chiqish, quyosh panellari orqali ishlaydigan suv nasoslari ishlab chiqarishni yo‘lga qo‘yish, quyosh va shamol stansiyalari uchun generator va ehtiyot qismlarni ishlab chiqarish masalalari muhokama etildi.
Davlat sherikchiligida tashkil etilgan kompaniyada elektr energiyasini olish jarayonida zarur bo‘lgan barcha uskuna va texnologiyalar ishlab chiqariladi va butun mamlakatdagi loyihalarning 20 foizidan ortig‘i amalga oshiriladi.
Samarqand viloyati delegatsiyasi korxona ko‘rgazmalar zali va ilmiy-texnik innovatsiya markazi bilan tanishdi, ishlab chiqarish tarixi, ixtirolar va kelgusi rejalar haqida maʼlumotlarga ega bo‘ldi.
Kompaniya vakillari tez orada Samarqandda bo‘lib, birgalikda amalga oshiriladigan loyihalarni ishlab chiqishi aytildi.
