O'zbekiston elchisi Ashraf Xodjayev "Power International Holding" kompaniyasi bosh ijrochi direktori o'rinbosari Moris Gattas bilan muzokaralar o'tkazdi, deb xabar bermoqda "Dunyo" AA.
Uchrashuvda O'zbekistonda iqtisodiyotning turli sohalarida investitsiya loyihalarini amalga oshirish masalalari muhokama qilindi.
"Power International Holding" kompaniyasi 1983-yilda tashkil etilgan bo'lib, dunyoning 19 ta mamlakatida faoliyat olib boradi. "Forbes" nashriga ko'ra, Yaqin Sharqdagi eng yirik kompaniyalardan biri hisoblanadi. Kompaniya 5 ta shoʻba korxonalari orqali energetika va metallurgiya, sog'liqni saqlash va turizm, qishloq xo'jaligi, mehmonxona majmualarini qurish kabi sohalarda loyihalarni amalga oshiradi: Kompaniya ishchilari soni 65 mingdan ortiq, amalga oshirgan loyihalari — 1100 ta, Qatar oziq-ovqat sanoatidagi ulushi — 70 foiz, 7 ta dam olish maskanlari, 7 ta mehmonxonalar, 90 ta restoranlar, 8 ta ko'ngilochar majmualari hamda 4 ta shifoxonalarga egalik qiladi.
Muzokaralar yakunida "Power International Holding" kompaniyasi tomonidan O'zbekistonda investitsiya loyihalari bilan bog'liq tegishli o'rganish ishlarini olib borish maqsadida Moris Gattasning yurtimizga tashrifini amalga oshirishga kelishib olindi.
