Joriy yilning I choragida O‘zbekistonning umumiy tashqi qarz hajmi 68,4 mlrd dollarni tashkil qilmoqda. Bu haqda Markaziy bankning “O‘zbekiston Respublikasi to‘lov balansi, xalqaro investitsiyaviy mavqei va tashqi qarzi” sharhida keltirilgan.
Unga ko‘ra, 2025 yil I choragida O‘zbekistonning umumiy tashqi qarz hajmi 68,4 mlrd dollarni tashkil qilib, shundan davlat tashqi qarzi hajmi 35,8 mlrd dollar hamda korporativ tashqi qarz hajmi 32,6 mlrd dollarga teng bo‘lgan.
Hisobot choragida joriy operatsiyalar hisobi 160,7 mln dollar manfiy saldo bilan shakllangan. Bu o‘tgan yilning mos davrida 2,1 mlrd dollarga teng bo‘lgan.
Savdo balansining manfiy saldosi 2024 yilning I choragiga nisbatan 34 foizga qisqarib, 2,6 mlrd dollarni tashkil qilgan. Bu eksport hajmining yuqori sur’atlarda o‘sishi sharoitida importning deyarli o‘zgarishsiz saqlanib qolishi bilan izohlanadi. Xususan, jami eksport hajmi 22 foizga oshib, qariyb 8 mlrd dollarni tashkil qilgan bo‘lsa, jami import hajmi 10,5 mlrd dollar atrofida shakllangan.
2025 yilning I choragi davomida O‘zbekistonga kelib tushgan xalqaro pul o‘tkazmalar hajmining o‘sishi birlamchi va ikkilamchi daromadlar balansi ijobiy saldo (mos ravishda 148,9 mln dollar va 2,2 mlrd dollar) bilan shakllanishiga sabab bo‘lgan.
Joriy operatsiyalar hisobi taqchilligi to‘g‘ridan to‘g‘ri, portfel va boshqa investitsiyalar jalb qilinishi hisobiga moliyalashtirilgan. Jumladan, 2025 yilning I choragi davomida mamlakatga to‘g‘ridan to‘g‘ri xorijiy investitsiyalarning sof kiritilishi 2024 yilning mos davriga nisbatan qariyb 2 barobarga o‘sib, 752,3 mln dollarga teng bo‘lgan.
Portfel investitsiyalarning sof jalb qilinishi asosan xalqaro obligatsiyalar bilan bog‘liq operatsiyalar hisobiga 1,5 mlrd dollarni tashkil qilgan. Yuqoridagi tarkibiy omillar hisobiga 2025 yilning I choragi yakuni bo‘yicha moliyaviy hisob manfiy saldosi 791,1 mln dollarni tashkil etgan.
