“Issiqliktaʼminoti” kompaniyasi va Fransiya taraqqiyot agentligi o‘rtasida Farg‘ona shahridagi Qirguli massivining issiqlik tizimini modernizatsiya qilish loyihasi bo‘yicha memorandum imzolandi. Bu haqda davlat korxonasi matbuot xizmati xabar berdi.
Loyiha 2027−2029 yillarda 76 kilometrlik issiqlik tarmoqlarini yangilash va 380 ta individual issiqlik punktlarini o‘rnatishni o‘z ichiga oladi.
Dastlabki hisob-kitoblarga ko‘ra, loyiha qiymati 39,9 mln dollarni tashkil etadi. U amalga oshirilgach, 317 ta ko‘p qavatli uy (16 617 ta xonadon) va 41 ta ijtimoiy obyekt markazlashtirilgan issiqlik taʼminoti bilan taʼminlanadi.
Agentlik O‘zbekistonda ekologiya, energiya tejamkorlik va suv taʼminotini yaxshilash bo‘yicha loyihalarni amalga oshiradi.
