O‘zbekiston Venetsiya biyennalesida yana ishtirok etmoqda. Bu haqda Prezident yordamchisi Saida Mirziyoyeva o'z sahifasida ma'lum qildi.
"O‘zbekiston Venetsiya biyennalesida yana ishtirok etmoqda va bu yil Toshkentning yonginasida joylashgan “Quyosh” geomajmuasi g‘oyasini o‘zimiz bilan olib keldik. Bugun O‘zbekiston Milliy pavilonining rasmiy ochilishi va qabul marosimi bo‘lib o‘tdi.
Pavilonimiz mavzusi o‘zida muhandislik fanlari, shaharshunoslik, biologiya va sun’iy intellektni birlashtirgan va “Intelligens. Tabiiy. Sun’iy. Kollektiv” deya nomlangan biyennale mavzusiga to‘la mos keladi.
Biz noyob “Quyosh” obyektining rolini qayta ko‘rib chiqishni taklif qilamiz. Uni nafaqat saqlab qolish, balki global va ilmiy munozaralarga kiritishni istaymiz.
Bu Venetsiya biyennalesidagi beshinchi ekspozitsiyamiz. Har safar biz ona yurtimizning ko‘z ilg‘amas qadriyatlarini, tarixga ehtirom, ilm-fanga bo‘lgan muhabbatini ko‘rsatib, jahon hamjamiyatini hayratga solishda davom etamiz.
Ushbu loyihaga o‘z kuch-g‘ayrati, ijodi va jonajon O‘zbekistonimizga bo‘lgan muhabbatini baxsh etgan jamoaga minnatdorchilik bildiraman. Sizlar tufayli pavilonimiz har doim katta qiziqish uyg‘otadi va ko‘plab mehmonlarni jalb qiladi.
Demak, dunyo O‘zbekiston sari tobora yaqinlashmoqda, uni kashf qilmoqda", deyiladi xabarda.
