BAAda muqim istiqomat qilib kelayotgan hamyurtlarimiz orasida hamjihatlikni mustahkamlash hamda vakolatxonaning ustuvor yo'nalishlarida hamkorlikni davom ettirish maqsadida O'zbekiston Bosh konsulxonasida faol vatandoshlarimiz bilan navbatdagi amaliy uchrashuv bo'lib o'tdi, deb xabar bermoqda "Dunyo" AA.
Suhbat chog'ida uzoq yillar davomida o'zining yirik xususiy turistik kompaniyasiga ega bo'lib, ushbu korxonani muvaffaqiyatli boshqarib kelayotgan Ravshan Zakirov bilan 2023-yil yakunlari bo'yicha Bosh konsulxona bilan hamkorlikda olib borilgan ishlar, shu jumladan turizm yo'nalishida amalga oshirilgan tadbirlarning sarhisobi qilindi.
Bugungi kunga kelib mamlakatimiz ko'plab rivojlangan davlatlar, shu qatori BAA bilan o'rnatilgan mustahkam aloqalarning ijobiy natijasi sifatida ikki davlat o'rtasida savdo-iqtisodiy, madaniy-gumanitar yo'nalishlardagi hamkorlik jadallashib bormoqda. Shu munosabat bilan so'nggi 4-5 yil ichida O'zbekiston va BAA o'rtasidagi aviaqatnovlar soni bir necha baravarga (haftasiga 46 reys) o'sdi. Ushbu ko'rsatkichlarni yanada yuqori darajaga olib chiqish esa Bosh konsulxonaning asosiy ustuvor yo'nalishlaridan biri etib belgilangan.
Uchrashuv yakunida kirib kelayotgan 2024-yilda vakolatxona rahnamoligida BAAdagi o'zbekistonliklarga tegishli bo'lgan kompaniyalar imkoniyati bilan mamlakatimiz turistik salohiyatini arab mintaqasida targ'ib qilish ishlari muhokama etilib, ishchi reja tuzib olindi.
