Amerikaning dunyoga mashhur ESPN sport portali o‘z reytingini yangiladi.
Biz uchun ahamiyatlisi, hamyurtimiz Isroil Madrimov (10-0-1, 7 KO)ning birinchi o‘rta vazn toifasi reytingida 3-o‘ringa ko‘tarilib olgani bo‘ldi. Bokschimiz bundan avval reytingda 8-pog‘onada borayotgandi.
Madrimov 8-mart kuni Saudiya Arabistoni poytaxti Ar-Riyod shahrida o‘tkazilgan prof boks oqshomida rossiyalik Magomed Kurbanovni 5-raundda texnik nokautga uchratib, vakant bo‘lib turgan WBA chempionlik kamarini qo‘lga kiritgan edi. Bu bilan u Kurbanovga faoliyatidagi ilk mag‘lubiyatni ham taqdim etgandi.
Yangilangan reytingda charm qo‘lqop ustamizdan oldingi o‘rinlarni ushbu vaznda sobiq mutlaq jahon chempioni Jermell Charlo (35-2-1, 19 KO) hamda WBO kamari sohibi Tim Szyu (24-0, 17 KO) band etgan.
