O‘zbekistonlik Muhammadjon Masharipov Toshkentda o‘tkazilayotgan yoshlar o‘rtasidagi jahon chempionatida oltin medalni qo‘lga kiritdi. Bu haqda O‘zbekiston dzyudo federatsiyasi xabar berdi.
Qayd etilishicha, -60 kilogramm vazn toifasida ishtirok etgan Masharipov finalda AQSH vakili Jonatan Yangga qarshi tatamiga chiqdi. Jahon reytingida birinchi o‘rinda turgan amerikalik sportchiga qarshi kechgan bellashuvning asosiy vaqtida g‘olib aniqlanmadi. Qo‘shimcha vaqt – “Golden Score”da esa o‘zbekistonlik dzyudochi ustunlikka erishib, chempionlikni qo‘lga kiritdi.
Ma’lum qilinishicha, bu O‘zbekiston vakilining yoshlar o‘rtasidagi jahon chempionatida -60 kilogramm vazn toifasida 24 yillik tanaffusdan so‘ng qo‘lga kiritgan ilk oltin medalidir. So‘nggi bor 2002-yilda Janubiy Koreyaning Cheju orolida o‘tkazilgan musobaqada Sanjar Zokirov ushbu vaznda jahon chempioni bo‘lgan. U finalda Qozog‘iston vakili Aset Tusupovni mag‘lub etgan.
Keyingi yillarda o‘zbekistonlik dzyudochilar mazkur vazn toifasida jahon chempionatining bir necha bor sovrindoriga aylangan. Xususan, 2008-yilda G‘abit Yesimbetov bronza, 2013-yilda Diyorbek O‘rozboyev kumush, 2024-yilda Murodil Murodillayev va 2025-yilda Samariddin Qo‘chqorov bronza medallarini qo‘lga kiritgan.
Qayd etilishicha, 2025-yilda Peruning Lima shahrida o‘tkazilgan chempionatda Jonatan Yang ham bronza medaliga sazovor bo‘lgan. Bu yil esa u finalda Muhammadjon Masharipovga imkoniyatni boy berdi.
Shuningdek, yangi jahon chempionining tayyorgarligiga 2013-yilgi yoshlar o‘rtasidagi jahon chempionatining kumush medali sohibi Diyorbek O‘rozboyev mas’ul bo‘lgan.









